Ganz e bsondere Bsuech hei mer höt gmacht! Ganz speziell! De Ma wo eus begleitet het, seit ufem Weg, dass beidi Eltere psychisch zemli chrank sege… eifach as Vorbereitig. Hmmm eus esches de scho zemli mulmig worde, well mer jo ke Ahnig hei, wie sech eso ne Chrankheit be ehne zeigt. Mer send uf total zerklüftete Strosse is gröschte Ghetto gfahre. Womer achöme wärde mer vom Vater scho mou met eme riesige Lache «welcome hallelujaa welcome» empfange und grad i sini Hütte gfüehr…t. Stockdunkel esches gsi und mer esch hend und vorne nümm wohl gsi. Wo hocki do ab? Doch denn foht dä Ma afoh luuthals Lobpriislieder zsinge und zklatsche dezue. So richtig genial. Denn folgt es chraftvolls und herzlichs Gebätt! Er het Gott dankt för die Gnad und Liebi woner höt zeigt und dass er ehres Elend gseh heg. Dä Ma hets kapiert!!!! Meine Güte😀… er het kapiert, dass mer nur es Werkzüüg vom höchschte Gott send und wonim de no gseit ha, dass henter eus e ganzi Chelegmeind stoht, hets mou e Rondi Amiin (amen) ghaglet. Sinere Frau het me scho agmerkt, dass do bez öppis ned ganz in Ornig esch be ehre aber i ha no nie e Mönsch met so vel Läbesfreud gseh. Sie esch so herzlich gsi und het so vel glachet und fasch bez umetanzt. I be jo e wildfrömdi Person aber sie het mi eifach packt und nömm los gloh. Gwöhnigsbedörftig….Woni am Schluss no es wunderschöns Chärtli vome Chend usem Kigo öbergäh ha am Grosi, esch si zutiefst grüehrt gsi. S’Ässe und alles wosi sösch no becho hei, het si so unendlich glücklich gmacht! Danke au do weder allne Spender

Im gröschte Schlamm id Chele fahre esch mou e ganz neui Erfahrig. D’Stross nur met eme 4wd befahrbar. De e geniale berüehrende Gottesdienscht im strömende Räge. Het zum Thema passt: mer söue si wie e guet bewässerete Garte. Am Afang hets Taufine gäh, zmitzt ide Chele😂. Scho genial die gliiche Lieder wie deheim zsinge, mer send haut scho e riese Familie!!!! Mega cool, alli Chend voll debii. Womer hei cho send het euses Honey scho uf eus gwartet.

Die anderi Siite vom Paradies: Höt hei mer ide Stadt beme Shop es chliises Büebli gseh stoh. Ganz elei… verhudleti Chleider. Es Strossechend! Sini Muetter esch gstorbe und di neui Frau het ned alli Chend welle aso händ si ne use kickt!!! Wie chame das nur mache?????? Er esch so verlore dert gstande. Mer hei ehm e rächti Mahlziit kouft, Milch und Wasser!!! Doch das Chend bruucht meh. I chönnt brüele ab söttige Bilder. Si brönne sech id Seel und me cha si ned eifach henter sech loh. Er stoht und schloft emmer am gliiche Ort. Aso wärde mer ehm secher no es Shirt, evtl e Pulli und Hose choufe. Doch gopf!!!! Wele Vater schaffts sis eigne Chend use zrüehre???? De no sones Chliises???

Eusi River Nile Expedition. Be bi jedem Photi dankbar gsi, hani mini gueti Kamera ipackt.

Afrika! E Kontinänt wo segnet, useforderet, ad Grenze bringt, Auge förs Wesentliche öffnet, Dankbarkeit uslöst, truurig macht und eifach soooo andersch esch as mer eus gwohnt send. E eifache Tee choche cha e halbe Brand uslöse (Explosion vom Wasserkocher), wenn me wett dusche, müend zerscht Kakerlake us de Duschi treit wärde, zmitzt ide Nacht gompe Hünd ad Türe und verursache e halbe Herzinfarkt, Esse egal i welere Form muess im Chüelschrank si sösch läbts! Mönsche wome no ni…e gseh het umarme eim, as wär me e lang verscholleni Schwöschter. E Sack Riis werd gwördigt, as wärs es Filet im Teig vom Feinschte! E Ichouf bedütet, stundelangs Feilsche um de Priis! Sie berüehre eim die Mönsche. Met ehrere Eifachheit, Fröndlichkeit und Offeheit erobere sie s’Herz im Storm! Afrika! E Kontinänt wo mi i Bann zoge het vor 26 Johr und grad weder vertraut esch worde! Mönsche wo eusi Hilf bruuche! Dini und mini…..